విజయ గీతాలు వెలివడేదెప్పుడు?

అందరాని హిమశిఖరం చేతులు చాచి పిలుస్తోంది

నవమి చంద్రుని సన్నటి వెన్నెల వెలుగురేఖలు
చెట్లనీడలతో కలిసి తెలుపు నలుపుల రంగవల్లులు దిద్దుతున్నాయి

తోడొచ్చేవాళ్ళెంత మంది ఉన్నా ఎవరి గమ్యం ఎటువైపో
ఎప్పుడు దారులు విడిపోతాయో తెలియని సందిగ్ధతలు
అప్పుడప్పుడూ తొంగి చూస్తూ భయపెడుతున్నాయి

తడబడు బుడిబుడి అడుగుల చిఱుకొలతలతో
ఎప్పటికి తరిగేను ఈ దూరము ?
కనుల గవాక్షాల్లో కదలాడే బిడియపు సంకెళ్ళు చీల్చుకొని
అధర ద్వారం నుండి విజయ గీతాలు వెలివడేదెప్పుడు?
                                         ----లక్ష్మీదేవి